- المخلوق الارضي المزدهر-

من طرف mona.sh الخميس نوفمبر 20, 2008 11:18 am

الرجاء الحذر .. حياتي مليانة .. مشاكل ... وما بكفي اني .. مجنون .. مفلس .. واصلا شو بدكم من واحد امنيته وهو زغير كانت انه يفتح دكانة لما يكبر .. ليش ؟ عشان يوكل كل اشي موجود فيها ببلاش..

المهم .. مشكلتي هالمرة .. اني تعودت احكي بطريقة سريعة .. واقرط الكلام .. واغير الحروف .. وابدل الكلمات .. خصوصا لما اكون مستحي او متعصبن او محرج .. و بطريقة ما شفتها عند حدا .. مش عارف شو الاسباب .. لكني بتوقع انه موقع انفي في خارطة وجهي سبب مؤثر جدا ..

وللاسف ان غلطاتي بتغيير الحروف والكلمات صارت ما تحطني انا بس في مواقف بايييييييخة .. بالعكس حتى اصحابي صارو بوضع صعب من تحت راسي ..

مرة كان لي صديق ناوي يخطب وحدة .. وشفنا اخوتها في مطعم .. وقالي صديقي زبطني قودامهم .. يعنى امدحني .. عشان تعجبهم شخصيتي ويقوله عني محترم وزي هيك .. مسكت اخو البنت الكبير . وبديتله مدح في صديقي .. قمت قلت : يا فلان كل شي في صديقي مليح بس عيبه انه ابوه مشحر (وعاد قصدي اقوله مشحبر يعني لانه بشتغل في مصنع دهان) .. اخو البنت انصدم من الكلمة ومشاها .. كملت حكي وقلت : هذا صاحبي حشاش درجة اولى ( قصدي اقوله حساس) .. اخو البنت وجهه قلب الوان قوس قزح .. كملت حكي وقلت : هو صاحبي بحبش حدا يشرب بالسيارة ,, وعاد قصدي انه ما حدا يشرب اشي يعني عصير كولا وهالموديل عشان تظلها نظيفة وجديدة .. بس اخو البنت فهم الموضوع غلط .. ورفع حواجبه .. وبالاخير قلت صديقي باختصار غبي وما بتفوت , يعني فرصتك تناسبه هالجوهرة "الي هو صديقي" وعاد قصدي بدل غبي غني .. قام رفع اخو البنت ايديه بالهوااااااااا .. وقال .. خلص خلص ما تكمل بديش اسمع .. والله مني عارف كيف انتي ماشي معه !!!

وعاد مرة كنت قاعد في قعدة ملانة زلام كبار واصحاب مناصب ورجال اعمال ووكلاء شركات .. وفي وسط النقاش الحاد عن الاقتصاد , نطيت.. ولانه صوتي زي الفزاعة سكتوا عشان يسمعوني .. وقال عامل حالي بدي اتفلسف , قلت : بصراحة هالايام الطقاع الحكومي مصعب علطقاع الي مش حكومي (قصدي اقول القطاع الحكومي) هم عيونهم صارت بدها تطلع من محلها ... وابن عمي صلحني بعد الغلط , وافحمتهم وسريت بالهم بفلسفتي .. فلخت من القعدة بعدها بخمس دقايق , ولا عمري رجعت على هذيك الدار ..

ومرة كنت في مطعم وقبالي وحدة حلوة .. وانا قوليت بدي امتحن اخلاقها , فصوريت احركلها بحواجبي .. واسوي حركات بوجهي (تقولوا عني مستر بين) .. واحط ملح في عيوني وافتح انفي واسكره .. هي عن غصب عنها ضحكت واعطتني وجه .. اشرت لها بايدي على تلفوني .. وهي هزت راسها لا لا .. المهم بعد ما خلصنا العشاء وهي طالعة من المطعم , قلت يا ريتني سنسال على هالبقرة (قصدي الرقبة) .. البنت قالت لف وجهك يا حضرة .. وما لفيت وجهي الا اخوتها جايين وعينك ما تشوف الا النور ..

ومرة فجاة مسكني شرطي عربي وكنت ناسي الرخصة بالدار .. وبعد محاولات تمسكن وترجي .. قالي الشرطي روح خلص هذه المرة روح والله صعبت علي .. قوميت قلتله : تسلم الله يفظحك (قصدي اقوله الله يحفظك) .. قام نادى علي بسرعة وقال للشرطي الي معه ركبه بالسيارة وخذو على محطة الشرطة .. قوميت قولتله انت فهمتني غلط يا طرشي , قام قالي انا طرشي .. قولتله قصدي شرطي .. يا عمي انا بخربط بالكلمات ...

ومرة كنت في مقابلة شخصية واختبار عمل .. سالني المدير شو هواياتك ؟ انا عامل حالي قودامه مثقف .. قلت بحب الطراءة والقوابع قصدي القراءة وجمع الطوابع .. قالي طيب شو اهتمامتك ؟ قولتله احب تياسة وسجارة قصدي يعني السياسة والتجارة .. قام سالني طيب شو خبراتك .. قولتله الحياة حلمتني (علمتني) , قام وقف المدير واطلع علي من فوق لتحت .. قولتله نععمعممم نعم !!! شو كنك بدك توكلني .. قالي ؟ اطلع برة قبل ما اطخك واطخ حالي قبلك !! طلعت وانا جارر خيبة الامل على كتافي ..

وبالاخر يا زوار اكبر منتدى عربي بالتاريخ .. كان صديقي نازل على محل .. ونسي تلفونه بالسيارة .. صار تلفونه يرن ويرن .. قمت حملته ورديت .. الا هي امه , قالت : انتي مين ؟ قلت لها انا فلان صديق فلان .. قالت هو وينه ؟ قلتلها هو نزل على المحل يشتري .. قالت : طيب ليش رديت على تلفونه ؟ قلتلها لانه غنمة تلفونه مثل غنمة تلفوني .. وعاد قصدي اقول نغمة .. قالت امه وجع يكسر ثمك .. وسكرت الخط في وجهي .. رن التلفون كمان مرة .. رديت وهذه المرة طلع ابوه .. قال : وين ابني ؟ قلتله نازل يشتري , قالي شكرا , قلتله عفوا الله يمحيك .. وعاد قصدي اقوله الله يحميك .. قام شتمني وبهدلني وطرق التلفون بوجهي ..

يلا بتركم مع التعليق ..
وتحاولوش تتخيلوني.. لانكم بعد لحظة مش رح تلقوني..

تشاووووووو بعلبة كاكاو ..